المشهد الاول:الطريق
الراوى:
فى يوم من الايام...زمان..زمان قوى..كان يونان النبى ماشى فى الطريق..رايح فين
..محدش عارف.هو نفسه مكنشى عارف يروح فين .قابلوه شويه اطفال.هم عارفينه و هو عارفهم
الاطفال معا:يونان.......يونان
جاى منين يا عمو يونان
رايح فين يا عمو يونان
جاى منين يا عمو يونان
رايح فين يا عمو يونان
( وفى اخر الاغنيه صوت الاطفال يوطى شويه )
يونان: ياولاد...ياولاد ملكم ومالى.خلليكم فحالكم..و سيبونى فحالى.
الاطفال معا: ...نفس الاغنيه السابقه...
يونان: و بعدين معاكم؟....مين اللى فسكتى رماكم؟ لكن امرى لله.طالما مصممين تعرفوا انا
انا هأوللكم.
الاطفال بطريقه عشوائيه:ايوة يا عموا...قللنا يا عموا...و حياتك يا عمو.....
يونان:انــــــــــا...انـــــــــــا ...انا جاى من هناك.اه..انا جاى من هناك.
وـــــــــ رايح...رايح....مش عارف اروح فين...بالى محتار
الاطفال معا:مالك مالك مالك....ايه اللى محير بالك
مالك مالك مالك....ايه اللى محير بالك
يونان:و بعدين بأة يولاد؟ مقلتلكم خليكوفحالكم وسيبونى فحالى.كفايه اللى حصللى.كفايه اللى جرالى
الاطفال بطريقه عشوائيه:و حياتك يا عمو..قلنا يا عموا..احكلنا يا عمو
يونان:طيب..طيب..طيب طولوا بالكم.(بصوت يشبه الهمس
"حأولكم سر بس بينى و بينكم...
الناس اللى ساكنين فى المدينه العظيمه اللى اسمها نينوى...الناس دول اشرار أوى.عشان
كده ربنا عايزنى اروح للناس دول وأأولهم ان ربنا هيألب المدينه بعد اربعين يوم لان شرهم
صعد امام الرب.بس انا عارف و متأكد ان الله رحوم و رءوف و طيب القلب.انا خايف
انى بعد ماروح للناس دول و احذرهم ..ممكن ربنا يسامحهم و ميقلبش المدينه..اطلع انا
بأه كداب؟يرضيكم اطلع كداب؟انا مالى و مال الشغلانه دى؟احسن حاجه اهرب...ايوه اهرب
بس اروح فين...اروح فين..ايوه ايوه..اروح ترشيش.اهى بلد بعيده.اهرب هناك من وجه
الرب.
الاطفال:مع السلامه يا عمو....مع السلامه يا عمو
الراوى:سافر يونان الى مدينه اسمها يافا و من هناك ياخد سفينه الى ترشيش.(نهايه المشهد الاول)
------------------------------------------------------
المشهد الثــــــــــــــــــــــــــــــــــــــــــــــــــــــانى :السفينه
الراوى:وصل يونان لشط البحر وراح يدور على سفينه رايحه ترشيش.لقى سفينه بتستعد ...خلاص حتمشى حالا..........
(يسمع صوت امواج البحر يتخلله صوت البوق ايذانا بالرحيل.)
يونان:يا ريس ...يا ريس....استنوا...استنوا...
ريس السفينه:ايه؟....عايز ايه يا راجل انته؟
يونان:خدونى معاكم...خدونى معاكم..انتو مش رايحين ترشيش؟
الريس:ايوه..رايحين...ادفع الاجره واطلع...يلا بسرعه..احنا ماشيين حالا.
الراوى: و دفع يونان الاجره و طلع على السفينه .كان فاكر انه كده خلاص هرب من وجه الرب.
االريس مخاطبا البحاره:يارجال ارفعوا لحمال و فكو لحبال و هيا للترحال ... هيا يا رجال
بحار 1:هيلا هيلا ........ البحاره معا:هيـــــــــــــــلا هيلا هيلا
وهيلا هيلا ...... البحاره معا:هيـــــــــــــــلا هيلا هيلا
وهيلا هيلا ...... البحاره معا:هيــــــــــــــلا هيلا هيلا
بحار2:افرد الوعك..........معا:يا ريس.
الريح فى طوعك........معا:يا ريس
معا :افرد الوعك يا ريس ..الريح فى طوعك يا ريس (تكرار)
بحار3:البحر ابالى..........معا:يا ريس
ايام و ليالى...........معا:يا ريس
معا: البحر ابالى يا ريس..ايام و ليالى يا ريس (تكرار)
بحار4:كلنا بنحبك...........معا:يا ريس
من طيبه قلبك..........معا: يا ريس
معا: كلنا بنحبك يا ريس .من طيبه قلبك يا ريس (تكرار)
(الاغنيه السابقه يتخللها صوت بوق السفينه و امواج البحر الخفيفه)
الراوى:و مشيت السفينه بعيد بعيد و دخلت فى العمق.لكن فجاه حصلت حاجه مش كويسه..
(هنا يسمع صوت رياح عاصفه مع رعد و مطر غزير وصوت امواج قويه)
الركاب بطريقه عشوائيه بخوف و فزع:ايه ده ايه ده...يا ساتر يا ساتر...الامواج عاليه اوى
السفينه بتميل اوى على جنبها...احنا هنغرق احنا هنغرق..
الريس: اللى معاه شيل يرميها فى البحر علشان نخف الحموله...كل واحد يمسك فى حاجه سابته
عشانميقعش فى البحر.وكل واحد يصلى لالهه عشان يزيح عننا الاخطار دى.الظاهر انو
فى حد عمل عمله وحشه خلت الهه يغضب علينا و يهيج البحر ضدنا.مين هو الشخص دة
نفسى اعرف مين هو.
الراوى:وراح الريس يطمن على الناس اللى فى السفينه..و لما أرب من يونان... ...
(هنا يسمع صوت شخير ملحوظ)
الريس موجها كلامه ليونان:انت نايم و بتشخر كمان و احنا بنغرق؟اوم صلى لالهك اوم.
موجها كلامه للجميع:يا مين يدلنى على الشخص اللى بسببه هنغرق كلنا.
احد البحاره:منعمل ارعه يا ريس و اللى تقع عليه الارعه هو دة الشخص اللى بتدور عليه.
اخر:تمام...نعمل قرعه اخر:نعمل قرعه يا ريس اخر:هو ده الحل نعمل ارعه
الراوى:و بسرعه عملو الارعه لجميع اللى فى السفينه بحاره وركاب حتى ريس السفينه نفسه.
وقعت الارعه على يونان..........
الريس:انت؟....انت سبب البلاوى دى كلها؟انت مين؟ و حكايتك ايه؟
الراوى:و حكى يونان حكايته اياها ...من اولها و عرفهم انه هربان من وجه الرب.
الريس:اعمل فيك ايه؟...هه...اعمل فيك ايه..قللى.
يونان :ارمينى فى البحر...انا غلطان...ارمينى فى البحرعشان البحر يهدا
الراوى:ريس السفينه مسمعش كلام يو نان ... اصله كان راجل طيب..مرضاش يرمى
يونان فى البحر.لكنه امر رجاله انهم يجدفوا بكل قوتهم و يرجعوا للشط تانى.لكنهم مقدروش.
الريح شديده اوى و الموج عالى اوى والجو وحش خالص.مفيش فايده.الريس اعد يفكر شويه
و بعد كده قال:...........
الريس:سامحنى يارب.مفيش حل ادامى غير كده.اضحى بواحد احسن ما الكل يهلك.سامحنى يا رب
الراوى:الريس امر تلاته من البحاره و شالوا يونان هيلا بيلا و هب رموه فى البحر و البهم بيتاطع عشانه.
(يسمع صوت طرطشه..يونان فى البحر)
-----------------------------------------------------
المشهد الثالث:الحــــــــــــــــــــــــــــــــــــــــــــــــــــــــــــــــوت
الراوى: بمجرد ان يونان لمس ميه البحر حصل هدؤ. بص شاف حوت ضخم اوى جاى ناحيته بسرعه........
(يسمع صوت مناسب)
الحوت:انا الحوت...توت توت....انا حتحوت..توت توت
انا الحوت فى البحر افوت و اعوم مسافات..فات فات
انا الحوت .. توت توت . . انا حتحوت ..توت توت
انا الحوت و بلف بحور و اعبر محيطات...طاط...طاط
انا الحوت.....توت توت...انا حتحوت..توت توت
انا الحوت بكتب كتابات و افهم فى لغات و احكى حكايات..يات يات
انا الحوت...توت توت...انا انا حتحوت..توت توت(تكرار مع اختفاء الصوت تدريجيا)
يونان: ايه ده؟ حوت بيتكلم؟حوت بيغنى؟
الحوت:ايوه يا يونان...انا الحوت الاعظم...انا اسمى حتحوت.ملك المنطقه دى كووووولها.
يونان: و كمان عارف اسمى؟
الحوت: ايوه..انا عارف اسمك و عارف حكايتك.حد يا راجل يعمل عملتك دى؟ال و عايز تهرب
طب تهرب و تروح فين؟ترشيش؟ربنا هناك.ان رحت لابعد مكان برده ربنا هناك.
ان نزلت اعماق البحار او حتى اسافل الارض.ان صعدت لقمم الجبال او حتى ركبت السحاب
بردة حتلاقى ربنا هناك.عارف ليه؟لانك رجل الله و روح الله معاك فى كل مكان تروحله .
يونان: بس انا خايف اروح للناس دول بتوع نينوى.
الحوت:متخفشى.الرب معاك يحميك.من المخاطر و الاهوال ينجيك .انا جاى مخصوص عشانك.
رغم اللى عملته.رغم عصيانك لربنا.الا انه مش ناسيك.ربنا امرنى انى اجى بسرعه
عشان ابلعك فى بطنى و بكده انجيك من الغرق و كمان تحس بغلطتك و كمان اوصلك لمكانك.
وجودك فى بطنى ممكن تسميه حبس.بس لغايه امتى انا معرفش.ابسط يا عم انت اول واحد
يتم حبسه تحت الميه.يا بختك يا عم اسمك هيكتب فى التاريخ.حكايتك دى هيحكيها جيل ورا جيل
و يتعلموا منها الدروس و العبر.تعالى بأه ابلعك. تعالى يا حبيبى تعالى.
يونان: بس اوعى تقرقشنى بسنانك.
الحوت: اقرقشك ايه يا عم دنا حتى عجوش و شنانى مخلعه.(صوت كحه عجوز بطريقه كوميديه)
متخافشى ربنا امرنى انى احافظ عليك.تعالى بأه يا حبيبى لما ابلعك تعالى.(صوت ارمشه)
الراوى: و بلع الحوت يونان.قعد يونان فى بطن الحوت تلت ايام و تلت ليالى.اعد يصلى و يصرخ لربنا
ويقول صلاه مؤثره اوى...............
يونان مرنما:اسمع صراخى يا سيدى.....و الى صلاتى امل اذنيك..(2)
ارحمنى وامسك بيدى(2)....فانا بحاجه شديده اليك...(2)
جازت من فوقى التيارات......و اغرقتنى الضيقات
و العشب التف برأسى(2)....و الماء عبر الى نفسى...(2)
اسمع صراخى....................الخ
ارحمنى و امسك....................الخ
اصلى اليك من جوف الحوت.....اصدرت امرا الا اموت
من جوف الهاويه صرخت(2).... و بالمراحم سمعت الصوت(2)
القــــــــــــــــــــــــــــــــــــــــــــــــــــــــــــــــــــرار
بصوت الحمد اذبح لك..........و اعود انظر هيكلك
لانك استجبت لى(2).........كل ما فيا يشكرك(2)
القـــــــــــــــــــــــــــــــــــــــــــــــــــــــــــــــــــــرار
الراوى:بعد التلت ايام و التلت ليالى اللى اعدهم يونان فى بطن الحوت,ربنا امر الحوت انه يخرج يونان
من بقه و ينزله على شط البحر فى امان.ربنا قال ليونان مره تانيه انه يروح نينوى ويحذر اهلها.
يونان:ياااااااااااه با انا كنت ههرب من وشك يا رب طب كنت هاروح فين؟؟؟؟
----------------------------------------------------------------
المشهد الرابـــــــــــــــــــــــــــــــــــــــــــــــــــــــــــــــــــــع:نينوى
الراوى:وصل يونان الى نينوى و اعد يلف المدينه كلها من مكان لمكان و هو يصرخ و يقول............
يونان:يا ناس يا ناس...يا اهل المدينه العظيمه نينوى..الرب الهنا بيحذركم انه هيقلب المدينه
بعد اربعين يوم لان شركم صعد ادامه.يا ناس توبوا عن خطاياكم.يا ناس فوقو من سكركم
يا ناس كفاياكم.اصحوا بأه.شهواتكم و ملذاتكم اللى انتو غارقانين فيها مش هتنفعكم.محدش
هينفع حد صدقونى.يا ريت تفكرو شويه.امشوا فى طريق ربنا.طريق ربنا مفهوش الشر اللى
انتو بتعملوه يعنى مش على هواكم,يعنى طريق ضيق,بس تعالو نحسبها.انهون احسن:طريق
ضيق وكرب و الامات وقتيه و بعدها سعاده الى ما لا نهايه...سعاده ابديه ملهاش حدودو.والا
تمتع وقتى و سعادة وهميه ووقتيه و بعدها عذاب ابدى...عذاب الى مالا نهايه.عذاب ملوش حدود؟
احسبوها تانى و فكرو احسبوها تانى و فكرو و يوم متحسبوها صح ,باب التوبه مفتوح.ربنا هيقبلكم
مهما كانت خطاياكم.
الراوى:الناس سمعوا كلام يو نان و خافوا جدا و ارتعبوا.كل واحد كبير و صغير تاب و صلى وصام
الكل صرخ للرب..عشان كده الرب رحمهم و قبل توبتهم و مقلبش المدينه.
-------------------------------------------------------------------
المشهد الاخيـــــــــــــــــــــــــــــــــــــــــــــــــر(اليقطينه)
الراوى:يونان بعد ما حذر الناس اعد بره المدينه مستنى انها تخرب لكن لما ربنا تراجع عن عقابه ليهم ,
يونان زعل اوى.يودى وشه من الناس دول فين.بعدما قلهم ان ربنا هيقلب المدينه بعد اربعين يوم,محصلتش
اى حاجه من دى.عمل يونان لنفسه حاجه كدة زى شمسيه يقعد تحتيها لكن الله فى الحال طلع شجره صغيره
عملت ضله على يونان احسن من الشمسيه اللى كان هو عاملها.لكن فى الفجر جت دوده كبيره اكلت فى الشجره
والشجره ماتت و نشفت .زعل يونان اوى على الشجره دى.و كمان جت رياح قويه خلعت الشجره الناشفه الميتانه
دى.يعنى الشجره انتهت خالص.زعل يونان اكتر.لكن ربنا حب يعلم يونان درس جامد اوى.ربنا قال ليونان
انت زعلت عشان الشجره اللى طلعتلك كده بسرعه فى يوم و ليله.مع انك لا زرعتها و لارويتها,يعنى متعبتش
فيها ومش عايزنى ازعل على شعب نينوى اللى كان هيهلك.
---------------------------------------------------------
نشكـــــــــــــــــــــــــــــــــر تعــــــــــــــــــــــب محبتكم
صلــــــــــــــــــــــــــــــــــوا من اجلـــــــــــــــــــــــــــى
( johnwhite(navarona77
موضوع: اوبريت يونان النبى 
الجمعة نوفمبر 23, 2007 7:24 am
حأولكم سر بس بينى و بينكم...
